Жусуп Абдрахманов туурасында документалдуу фильм тарта турчу режиссер белгилүү болду

Жусуп Абдрахманов туурасында документалдуу фильм тарта турчу режиссер белгилүү болду

12-июлда Бишкек шаарында кыргыз элинин даңктуу уулу, коомдук жана саясий ишмер Жусуп Абдрахманов туурасында документалдуу фильм тартуу укугуна ээ болуу үчүн белгилүү жана жаныдан чыгып келе жаткан режиссерлор арасында жарыш болуп өттү.

Аталган жарыш коомдук ишмер жана меценат Аскар Салымбековдун демилгеси менен уюштурулуп,  Кыргызстандын сакталышына жана өнүгүшүнө зор салымын кошкон Жусуп Абдрахмановдун бейнесин толук ачып бере ала турган мыкты режиссерду тандап алууга багытталган.

Жарыштын талаптарына ылайык Айдаралиев Бекболот, Абдыжапаров Эрнест, Абдыкадыров Нурлан, Боркошев Нурбек, Курманкулов Нуркамиль, Машрапов Руслан, Турдубаев Бакыт жана Эралиев Замир сыяктуу режиссерлор өздөрүнүн конкурстук иштерин тапшырышкан. Аталган режиссерлор атайын түзүлгөн коомдук жюринин алдында документалдуу фильмди тартуу боюнча көз караштарын жана пландарын тартуулашты. Жюринин курамына коомдук ишмер Аскар Салымбеков, экс-премьер-министр Амангелди Муралиев, Жогорку Кенештин депутаты Садык Шернияз, Кыргыз Республикасынын эл артисти, режиссёр, сценарист Геннадий Базаров, Кыргыз улуттук академиялык Т.Абдумомунов атындагы драма театрынын директору Асылбек Озубеков, журналист Бакыт Орунбек, коомдук ишмер, режиссёр и сценарист Бейшенбек Мамбетакунов, «Жусуп Абдрахмановдун Фонду» коомдук фондусунун директору Мирбек Усебаев жана «Аскар Салымбековдун Фонду» коомдук фондусунун директору Амангелди Жумадиловдор киришип, ар бир режиссердун долбоорун угуп, аларга суроолорун беришти.

Долбоолор сунушталып аяктаган соң, жюри өз алдынча талкуу жүргүзүп, жашыруун добуш берүүнүн негизинде документалдуу фильмди тартуу укугун ала турчу режиссерду аныктады. Жеңүүчүнүн аты жалпы катышуучулардын алдында жюринин мүчөсү Садык Шернияз тарабынан айтылып, Эрнест Абдыжапаров татыктуу деп табылгандыгы белгилүү болду.   

Акырында Аскар Салымбеков бул маанилүү фильмди тартуу сынагына катышкан бардык режиссерлорго ыраазычылык билдирип, бул фильмди тартуу демилгеси көп жыл мурда эле көтөрүлгөнүн, сценаристтер демөөрчүлүк кылуу сунушу менен кайрылып келишкенин, бирок бардык режиссерлорго мүмкүнчүлүк берип, татыктууну тандоо үчүн конкурс уюштуруу чечими кабыл алынганын белгиледи. Ошондой эле өз сөзүндө бул жерге тарыхты баалап, бабаларыбыздын атын түбөлүк калтырууну максат кылган адамдар чогулганын айтып, Эрнест Абдыжапаровго чыгармачылык ийгилик каалоо менен келечекте легендарлуу инсан Жусуп Абдрахмановдун бейнесин  толук ачып бере ала турган фильм пайда болоруна үмүт кыларын белгилеп өттү.

Белгилеп өтүүчү нерсе аталган жарыш журналист Бактыт Орунбек жазган сценарийдин негизинде «Аскар Салымбековдун Фонду» коомдук фондусу тарабынан уюуштурулган.